Desde Saberes do Monte queremos ampliar o coñecemento das persoas, comunidades, explotacións e iniciativas que traballan nos territorios do proxecto e desenvolven —ou están interesadas en desenvolver— actividades que contribúan á conservación da biodiversidade.
Buscamos especialmente persoas vinculadas á xestión de montes, gandería extensiva, cabalos e besteiros, apicultura, ecoturismo e outros usos ou aproveitamentos do territorio relacionados cos obxectivos do proxecto.
Durante o transcurso de Saberes do Monte desenvolveremos diferentes actuacións: encontros e espazos de traballo nos territorios, intercambio de experiencias, formación sobre prácticas de xestión, actividades vinculadas á marca colectiva Saberes do Monte, accións de divulgación e outras iniciativas relacionadas coa conservación da biodiversidade e a valorización dos sistemas tradicionais agrogandeiros necesarios para manter hábitats.
Se desenvolves algunha destas actividades, xestionas territorio ou estás valorando poñer en marcha unha iniciativa relacionada, podes deixarnos os teus datos e contarnos brevemente o que fas e os temas que che interesan.
Esta información permitiranos coñecer mellor os axentes activos dos territorios e contactar con aquelas persoas ou iniciativas cuxo perfil encaixe cos requisitos e obxectivos das diferentes actividades que se vaian desenvolvendo no proxecto.
Ámbitos territoriais de Saberes do Monte: Serra do Xistral, Negueira de Muñiz, Serra dos Ancares, Serra do Courel e Serra da Groba.
Municipios: O Valadouro, Muras, Abadín, Ourol, Xove, Alfoz, Vilalba, Negueira de Muñiz, Cervantes, Folgoso do Courel, Oia e O Rosal.
